Xəbərlər

“Təhsil” istirahət mərkəzində tələbələr üçün ixtisas yönümlü qış düşərgələri yekunlaşıb

Elm və Təhsil İşçiləri Həmkarlar İttifaqı və “Bir Könüllü” Tələbələrin Əməkdaşlığı İctimai Birliyinin birgə təşkilatçılığı ilə tələbələr üçün 5-9 fevral tarixlərində keçirilən ənənəvi ixtisas yönümlü qış düşərgələri yekunlaşıb.

“Təhsil” İstirahət Mərkəzində baş tutan düşərgələrin əsas məqsədi iştirakçıların ixtisas biliklərinin dərinləşdirilməsi, analitik və tənqidi düşünmə, problem həll etmə, innovativ yanaşma, eləcə də liderlik və komanda işi bacarıqlarının inkişaf etdirilməsi olub. Layihə çərçivəsində gənclərin gələcək akademik və peşəkar fəaliyyətə hazırlıq səviyyəsinin artırılması prioritet kimi müəyyən edilib.

Cari il üzrə düşərgələr iki istiqaməti əhatə edib. Riyaziyyat sahəsi üzrə “MathCamp2026” layihəsi “Bir Könüllü” Tələbələrin Əməkdaşlığı İctimai Birliyi, Elm və Təhsil İşçiləri Həmkarlar İttifaqı və “PathtoMath” Həvəskar Riyaziyyatçılar Klubunun birgə təşkilatçılığı ilə həyata keçirilib. Texnologiya və mühəndislik istiqamətləri üzrə “TechCamp2026” düşərgəsi isə “ESTIEM LG Baku” və “EESTEC LG Baku” təşkilatlarının tərəfdaşlığı çərçivəsində təşkil olunub.

Düşərgələrdə seçim mərhələsindən keçmiş riyaziyyat, texnologiya, mühəndislik və əlaqəli sahələr üzrə təhsil alan əlli nəfərə yaxın perspektivli tələbə iştirak edib. Proqram çərçivəsində ixtisaslaşmış təlimlər, praktiki məşğələlər, layihə əsaslı fəaliyyətlər və mentorluq görüşləri keçirilib.

Qeyd edək ki, Elm və Təhsil İşçiləri Həmkarlar İttifaqı gənclərin bilik və bacarıqlarının inkişafına yönəlmiş tədris və innovasiya yönümlü təşəbbüslərin həyata keçirilməsinə davamlı dəstək göstərir.

ETİHİ Respublika Komitəsi tərəfindən 700-dən çox ittifaq üzvü üçün ekskursiya və turlar təşkil olunub

Elm və Təhsil İşçiləri Həmkarlar İttifaqı Respublika Komitəsi tərəfindən yanvar ayı ərzində 700 nəfərdən çox ittifaq üzvü üçün ekskursiya və turlar təşkil olunub.

Belə ki, 533 nəfər təhsil işçisi rayon və şəhər komitələrinin təşkilatçılığı ilə Quba, Qusar, Qəbələ, Şamaxı və Astara rayonlarına təşkil edilmiş bir neçə günlük turlardan yararlanaraq istirahət ediblər.

168 nəfər təhsil işçisi isə "İçərişəhər" Tarix-Memarlıq Qoruğuna və açıq səma altında yerləşən Qala Etnoqrafiya Muzeyinə ekskursiya ediblər.

Qeyd edək ki, bu cür maarifləndirici və istirahət xarakterli gəzintilər gələcəkdə də mütəmadi olaraq təşkil ediləcəkdir.

“Azərbaycan Nəşriyyatları Assosiasiyası” İctimai Birliyində Həmkarlar İttifaqı təsis olunub

Azərbaycan Nəşriyyatları Assosiasiyasında Həmkarlar İttifaqı Komitəsinin təsis yığıncağı keçirilib. Təsis iclasında Assosiasiya nəzdində Həmkarlar İttifaqı Komitəsinin yaradılması ilə bağlı təşkilati məsələlər müzakirə olunub.

Tədbirdə Azərbaycan Nəşriyyatları Assosiasiyasının 14 nəfər əməkdaşı, həmçinin Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə və sədrin müşaviri Renata Mansurova iştirak ediblər.

Təsis iclasında Həmkarlar İttifaqı Komitəsinin və Təftiş Komissiyasının üzvləri, eləcə də komitənin sədri seçilib, yaradılan qurumun ETİHİ Respublika Komitəsinin xidmətinə qəbul edilməsi barədə qərar qəbul olunub.

Elm və Təhsil İşçiləri Həmkarlar İttifaqı Respublika Komitəsi yeni üzvləri ilə birgə həmrəyliyə əsaslanan fəaliyyət istiqamətini davam etdirməkdədir.

2 fevral- Azərbaycan Gəncləri Günü

2 fevral – Azərbaycan Gəncləri Günü münasibətilə Şəki Dövlət Dram Teatrında Şəki Şəhər İcra Hakimiyyəti, Şəki-Zaqatala Regional Təhsil İdarəsi, Elm və Təhsil İşçiləri Həmkarlar İttifaqı Şəki Şəhər Komitəsinin birgə təşkilatçılığı ilə tədbir keçirilib.

Tədbirdə Şəki Şəhər İcra Hakimiyyətinin, Şəki-Zaqatala Regional Təhsil İdarəsinin, Elm və Təhsil İşçiləri Həmkarlar İttifaqı Şəki Şəhər Komitəsinin, Şəki rayonu üzrə Təhsil sektorunun rəhbər şəxsləri, şəhid ailələrinin üzvləri, təhsil işçiləri, ictimaiyyətin nümayəndələri, gənclər iştirak ediblər.

Əvvəlcə Azərbaycan Respublikasının Dövlət Himni səsləndirilib, ardınca Azərbaycanın müstəqilliyi və suverenliyi uğrunda canından keçmiş şəhidlərimizin əziz xatirəsi bir dəqiqəlik sükutla yad olunub.

Sonra Ümummilli lider Heydər Əliyevin gənclərə göstərdiyi diqqət və qayğısını əks etdirən videoçarx nümayiş etdirilib.

Tədbirdə çıxış edən Şəki Şəhər İcra Hakimiyyətinin başçısı Elxan Usubov, Şəki-Zaqatala Regional Təhsil İdarəsinin müdiri Günay Mahmudova, Elm və Təhsil İşçiləri Həmkarlar İttifaqı Şəki Şəhər Komitəsinin sədri Ziyafət Xasiyeva, Şəki şəhər 5 nömrəli tam orta ümumtəhsil məktəbinin direktor müavini Ülvi Məmmədov gəncləri 2 fevral – Azərbaycan Gəncləri Günü münasibətilə təbrik ediblər, onlara verilən davamlı dövlət dəstəyindən danışıblar, gənclərin ölkənin ictimai, elmi və sosial həyatındakı rolunu vurğulayıblar.

Tədbirdə 2 fevral – Azərbaycan Gəncləri Günü münasibətilə təhsil və digər sahələrdə xüsusi fəallığına, göstərdikləri xidmətlərə və əldə etdikləri uğurlara görə bir qrup şəxsə Şəki Şəhər İcra Hakimiyyətinin, Şəki-Zaqatala Regional Təhsil İdarəsinin, Elm və Təhsil İşçiləri Həmkarlar İttifaqı Şəki Şəhər Komitəsinin Fəxri Fərman, diplom və hədiyyələri təqdim edilib.

Tədbir Şəki Dövlət Dram Teatrının aktyorlarının səhnəcikləri, Şəki Dövlət Regional Kollecinin tələbə və müəllim heyyətinin birgə hazırladığı bir birindən rəngarəng musiqiləri,rəqs qruplarının və məktəbli idmançıların nümunəvi çıxışları ilə davam edib.

Sonda idarə müdirləri və bölmə rəhbərləri gənclərlə birgə şirniyyat masası ətrafında söhbət edib, onlara öz tövsiyələrini veriblər.

Yanvar ayında yollayışlardan yararlananların statistikası

Elm və Təhsil İşçiləri Həmkarlar İttifaqı Respublika Komitəsi yanvar ayında ittifaq üzvlərinə sanatoriya-kurort yollayışları təqdim edərək onların Azərbaycan Həmkarlar İttifaqları Konfederasiyasının tabeliyindəki müalicə və istirahət mərkəzlərindən faydalanmasını təmin edib.

Ay ərzində ümumilikdə 449 nəfər yollayışdan yararlanıb. Onların 216 nəfəri ittifaq üzvü, qalanları isə ailə üzvləridir.

Yanvar ayında ilk həmkarlar təşkilatlarının sədrləri üçün keçirilən proqram çərçivəsində ailə üzvləri ilə birlikdə 92 nəfər 3 günlük müalicə paketindən yararlanıb.

Bununla yanaşı, rayon və şəhər komitələrinin təşkil etdiyi ekskursiyalara 165 nəfər ittifaq üzvü cəlb edilib.

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib. Tədbirlərdə təhsil müəssisələrində çalışan gənc həmkarlar ittifaqı üzvləri, müəllimlər və ictimai fəallar iştirak ediblər.

Tədbir çərçivəsində gənclərin fikir və təklifləri dinlənilib, onları maraqlandıran məsələlər ətrafında səmimi müzakirələr aparılıb. Fəallığı ilə seçilən gənclər mükafatlandırılıb, onlara gələcək fəaliyyətlərində uğurlar arzulanıb.

Gələcək gənclərin əlindədir

2 Fevral – Azərbaycan Gəncləri Günü münasibətilə ETİHİ Şəki Şəhər Komitəsi tərəfindən xidmətində olan üzv təşkilatlarda çalışan 300 nəfər gənc ittifaq üzvü hədiyyələrlə təltif olunub.

Əsas məqsədi təhsil sahəsində çalışan gənclərin əməyini dəyərləndirmək, onların sosial iqtisadi və əmək hüquqlarını qorumaq və gənc müəllimlərin inkişafına dəstək göstərmək olan komitə gənclərə hər zaman diqqət və qayğı ilə yanaşaraq, onların təhsil sistemində aktiv rolunu, yaradıcı potensialını və məktəb həyatına verdikləri töhfəni yüksək qiymətləndirir. Gənc müəllimlərin peşəkarlığının artırılması, sosial rifahının yaxşılaşdırılması və onların innovativ fəaliyyətə təşviq edilməsi ETİHİ Şəki Şəhər Komitəsinin əsas prioritetləri sırasındadır.

Gənc əməkdaşlar təltif olunub

ETİHİ Şəki Şəhər Komitəsi və Şəki-Zaqatala Regional Təhsil İdarəsinin birgə təşkilatçılığı ilə 2 Fevral – Azərbaycan Gəncləri Günü qeyd olunub. Bu münasibətilə idarənin və komitənin bir qrup gənc əməkdaşı təltif olunub.

ETİHİ Şəki Şəhər Komitəsinin sədri Ziyafət Xasiyeva çıxış edərək gənclərin təhsil sistemindəki rolundan bəhs edib, onların peşəkar inkişafına göstərilən diqqət və qayğıya görə təşəkkürünü bildirib. Komitə sədri gənc əməkdaşları daim öz üzərlərində çalışmağa, bilik və bacarıqlarını artırmağa çağırıb.

Tədbirdə çıxış edən Şəki-Zaqatala Regional Təhsil İdarəsinin müdiri Günay Mahmudova gənc əməkdaşları əlamətdar gün münasibətilə təbrik edərək, Ulu Öndər Heydər Əliyevin əsasını qoyduğu dövlət gənclər siyasətinin Prezident cənab İlham Əliyev tərəfindən uğurla davam etdirildiyini, prezidentin rəhbərliyi ilə gənclərin hərtərəfli inkişafı, təhsil alması və cəmiyyətin fəal üzvü kimi formalaşması üçün geniş imkanlar yaradıldığını,eyni zamanda bu siyasətin həyata keçirilməsində gənclərin üzərinə mühüm vəzifələr düşdüyünü diqqətə çatdırıb.

Sonda Şəki-Zaqatala Regional Təhsil İdarəsinin və ETİHİ Şəki Şəhər Komitəsinin Fəxri Fərman və hədiyyələri gənc əməkdaşlara təqdim olunub.

Fikir mübadiləsi və gözləntilər

Şəki-Zaqatala Regional Təhsil İdarəsinin təşkilatçılığı ilə rəhbərlik etdiyi təhsil müəssisələrində təlimlərin keyfiyyətinin yüksəldilməsi,qarşılıqlı əməkdaşlığın gücləndirilməsi və təcrübə mübadiləsinin aparılması məqsədilə müxtəlif mərkəzlərdə metodiki seminarlar təşkil olunub.

29–30 yanvar tarixlərində davam edən seminarlar çərçivəsində ETİHİ Şəki Şəhər Komitəsinin sədri Ziyafət Xasiyeva tərbiyəçi-müəllimlər və müəssisə rəhbərləri ilə keçirilən görüşlərdə iştirak edib. O, toplantılarda əsasən müəssisə rəhbərlərinə həmkarlar ittifaqının ilk təşkilat sədrləri ilə aparılan işlər, görülən fəaliyyətlər və gələcək birgə layihələr barədə geniş məlumat verib, fikir mübadiləsi aparıb.

Qeyd edək ki, 29-30 yanvar tarixlərində idarənin tabeliyində olan təhsil müəssisələrindən 5000-dən artıq təhsil işçisinin qatıldığı metodiki seminarların əsas məqsədi, 2025-2026-cı tədris ilinin I yarımili üzrə qiymətləndirmə nəticələrinin təhlili, hesabatlılıq və məsuliyyət bölgüsünün gücləndirilməsi, təhsil müəssisələrində inkişaf prosesinin monitorinqi, eləcə də yerlərdən daxil olan təkliflərin dinlənilməsi və müzakirəsindən ibarət olub.

"Ağ Adam"- tolerantlıq nümunəsi

Azərbaycan şairi,tərcüməçisi, Azərbaycan, Gürcüstan və Rusiya Yazıçılar Birliklərinin üzvü Giya Paçxataşvilinin Şəkidə 65 illik yubileyi olunub. M.F Axundov adına mədəniyyət evində baş tutan tədbir ədəbi-mədəni mühitin nümayəndələrini, ziyalıları və ictimaiyyət nümayəndələrini bir araya gətirib.

Yubiley mərasimində, ETİHİ Şəki Şəhər Komitəsinin sədri Ziyafət Xasiyeva, Zaqatala–Balakən Yazıçılar Birliyinin üzvü Almaniz Ələkbərli, MİHİ Şəki Rayon Komitəsinin sədri Nəzakət Əliyeva, şairin doğulduğu Qax şəhərindən gəlmiş tanınmış ziyalılar,şairlər, eləcə də şəkinin təhsil və mədəniyyət sahəsində çalışan əməkdaşları iştirak ediblər. 

Tədbirdə çıxış edənlər- ETİHİ Şəki Şəhər Komitəsinin sədri Ziyafət Xasiyeva, MİHİ Şəki Rayon Komitəsinin sədri Nəzakət Əliyeva, Zaqatala-Balakən Yazıçılar Birliyinin üzvü Almaniz Ələkbərli,şair Solmaz Elqızı və Zaur İlham Giya Paçxataşvilinin çoxşaxəli yaradıcılığı,sözə və sənətə olan bağlılığı,azərbaycan və gürcü xalqları arasında dostluğu,sülhü və tolerantlıq kimi dəyərlərləri təbliğ etməsi barədə fikirlər səsləndiriblər.

Tədbirdə şairin müxtəlif illərdə qələmə aldığı şeirlərdən nümunələr və sözlərinə bəstələnmiş musiqilərdən parçalar səsləndirilib.

Sonda yubilyara ETİHİ Şəki Şəhər Komitəsi tərəfindən şairin portireti hədiyyə olunub.

Şair sonda doğulduğu Qax şəhərində 50 illik yubileyini qeyd edən Ziyafət Xasiyevaya o cümlədən,bu tədbirin təşkilində zəhməti olan digər təşkilatçılara və iştirakçılara öz dərin minnətdarlığını bildirib.

Üzvlərimizin sağlamlığı diqqət mərkəzindədir

Azərbaycan Həmkarlar İttifaqları Konfederasiyasının (AHİK) müalicə və sağlamlıq mərkəzlərindən faydalanmaq üçün təşkil etdiyi “Endirim kampaniyası” haqqında ilk təşkilatlarda komitə sədrləri tərəfindən ittifaq üzvləri məlumatlandırılıb.

 Kampaniyanın şərtləri, güzəştlərin mahiyyəti və müraciət qaydaları barədə üzvlərə ətraflı izahat verilib. Elanlar çoxaldılaraq ilk təşkilatlara çatdırılıb,həmçinin maarifləndirilmə istiqamətində zəruri tədbirlər həyata keçirilib.

ETİHİ Şəki Şəhər Komitəsi üzvlərinin sağlamlıqlarının qorunması məqsədi ilə müalicə və sağlamlıq mərkəzlərindən istifadənin əlçatanlığını təmin etmək məqsədi ilə maarifləndirmə işlərini davam etdirir.

Azadlığa gedən yol

Elm və Təhsil İşçiləri Həmkarlar İttifaqı Şəki Şəhər Komitəsi, Şəki-Zaqatala Regional Təhsil İdarəsi, Şəki Rayonu üzrə Təhsil Sektoru və ittifaq üzvləri ilə birgə yanvar faciəsinin 36 -cı ildönümü ilə əlaqədar olaraq şəhidlərimizin əziz xatirəsini anmaq məqsədilə Şəhidlər Xiyabanını ziyarət edərək,Vətənimizin azadlığı və müstəqilliyi uğrunda canından keçən qəhrəman övladlarımızın məzarları önünə tər qərənfillər düzüblər.

Ziyarət zamanı 20 Yanvar şəhidlərinin Azərbaycan tarixində tutduğu əvəzsiz yerdən, onların göstərdiyi mərdlik və fədakarlıqdan bəhs edilib.

Qeyd olunub ki, həmin qanlı gecədə şəhid olan soydaşlarımızın igidliyi xalqımızın azadlıq iradəsinin sarsılmazlığını bütün dünyaya nümayiş etdirdi.